ინტერვიუ
ხათუნა სამნიძე: "ეჭვებია, რომ წინასაარჩევნო კამპანია იქნება სწორედ ამ ვიდეოშანტაჟებზე დაფუძნებული“

ეჭვებია, რომ წინასაარჩევნო კამპანია იქნება სწორედ ამ ვიდეოშანტაჟებზე დაფუძნებული“

 

 

 

- თქვენი აზრით, რამდენ ხანს შეინარჩუნებენ თქვენი პარტიის წევრები მინისტრის პორთფელებს?

 

- მე მგონი, ვერავინ ზუსტ პასუხს ვერ გეტყვით. ბუნერივია, რომ მინისტრები, რომლებიც მუშაობენ ახლა მინისტრთა კაბინეტში, პარტიის წინასაარჩევნო კამპანიაში უნდა ჩაერთონ - ასეთ დროს ისინი მინისტრები ვერ იქნებიან. მე მოლოდინი მაქვს, რომ „ქართული ოცნება“, პრემიერ-მინისტრი, ჩვენი პარტნიორები შეძლებენ იმ თანამშრომლობის რეჟიმში მუშაობას, რომელიც ჩვენ შევთავაზეთ. და ეს იმიტომ, რომ დამტკიცებუ-ლია საარჩევნო სამთავრობო პროგრამა და ამაში, რესპუბლიკელებიც მონაწილეობას იღებდნენ და სამივე სამინისტროს ხედვა თავსებადია ამ პროგრამასთან. თუ პრობლემები წარმოიქმნება პრემიერის მხრიდან, ამას ჩვენ ვერ შევცვლით...

 

- არ გეშინიათ, რომ ალასანიას მდგომარეობაში აღმოჩნდეთ, რომელიც იმდენ ხანს ებღაუჭებოდა მინისტრის სავარძელს, ვიდრე იქიდან არ გამოაპანღურეს?

 

- მე მგონი, არა. მე დარწმუნებული ვარ ამაში. ალასანიას ვითარება აბსოლუტურად განსახვავებულია რესპუბლიკელების ვითარებისგან. ჩვენ განვაცხადეთ, რომ ცალკე ვაპირებთ გასვლას არჩევნებზე. ეს სხვა ვითარებაა, რადგან კოალიციიდან არ გავდივართ და ეს ემსგავსება უფრო თემატურ თანამშრომლობას: ვამბობთ, რომ სამინისტროებში ვრჩებით, მანამ სანამ, ამას არ შეცვლის პრემიერი ან ჩვენ. ჩვენ თუ დავინახეთ, რომ ჩვენი პოლიტიკური დღის წესრიგით, რომ მინისტრები აღარ უნდა იყვნენ მინისტრები, ამას, რა თქმა უნდა, შევცვლით.

თემატურ თანამშრომლობას ამას რატომ ვეძახით? პარლამენტში და საკრებულოში ჩვენ გვაქვს პოლიტიკური დღის წესრიგი, პარტიული ინტერესები და პრიორიტეტები , რომლის ფარგლებშიც იმოქმედებენ ფრაქციები ადგილებზე. აქედან გამომდინარე, სხვა ვითარებაა. თან პრემიერის განცხადება გვაქვს მოსმენილი, რომელიც ამბობს, რომ ის მზადაა ითანამშრომლოს, არ შეცვალოს მინისტრთა კაბინეტი. ვითარება სულ სხვანაი-რია. არჩევანი გავაკეთეთ ჩვენ და პრემიერისგან მივიღეთ პასუხი, რომ ის მზადაა ითანამშრომლოს მინისტრებთან. ასეთი მოლოდინი არ არსე-ბობს, რომ ვინმემ აიძულოს მინისტრები გადადგნენ.

 

- თქვენ განაცხადეთ, რომ თემატური თანამშრომლობა გაქვთ. რაიმე კონკრეტული თემები იგულისხმება?

 

- არა. აქ იგულისხმება ის, რომ ყველა საკითხზე, სადაც რესპუბლიკური პარტია ხედავს, რომ მისი პოზიცია განსახვავებულია უმრავლესობის პოზიციისგან, ის ამას დააფიქსირებს. ეს ახალი არ არის. ჩვენ ამას ყოველთვის ვაფიქსირებდით, თუმცა ჩვენ ვიყავით გაცილებით კომპრომისული, ვიდრე ახლა შეიძლება აღმოვჩნდეთ. მაგრამ იქნება საკითხები, სასიცოცხლოდ მნიშვნელოვანი ქვეყნისთვის, რომლებზეც ჩვენ წინასწარ შევუთანხმდებით უმრავლესობას, რომ მათთან ერთად მხარს დავუჭერთ ამ საკითხებს.

 

- მკაფიოდ რომ თქვათ, თქვენ ხელისუფლებაში ხართ თუ ოპოზიციაში?

 

- რაც ახლა ხდება, ეს პირველად არის საქართველოში და გასაგებია, რომ ასეთი კითხვა ჩნდება. ჩვენ ვართ წინასაარჩევნო ვითარებაში, როცა პარტია ინდივიდუალურად ემზადება არჩევნებისთვის. რეალურად, ვართ ჩვენ ამ ფაზაში და ვემზადებით. მეორე მხრით, გვყავს ადამიანები საპასუხისმგებლო თანამდებობებზე და ისინი აგრძელებენ ქვეყნისთვის მნიშვნელოვან საკითხებზე მუშაობას. სამთავრობო პროგრამა დამტკიცებულია, ძირითად საკითხებზე შეთანხმებული ვიყავით 2012 წელსაც. ამიტომ, ასე ცალსახად ვერ ვიტყვით, რომ ან ოპოზიციაში ვართ, ან ხელისუფლებაში. ჩვენ ვართ წინასაარჩევნო ფაზაში, როცა არჩევნებისთვის ვემზადებით ინდივიდუალურად და თან ვთანამშრომლობთ ხელისუფლებასთან წინასწარ შეთანხმებულ ჩარჩოში.

თუ კითხვები ასე დაისმება - რამდენად შევძლებთ ვიყოთ კრიტიკული და როგორ ვაპირებთ პარტიის წინ წამოწევას - ჩვენ ღიად ვილაპარაკებთ იმაზე, თუ რისი გაკეთება შევძელით, როცა ვიყავით ხელისუფლებაში. ჩვენ არ ვიყავით დომინანტი პარტია. ვიყავით და ვართ უმცროსი პარტნიორი, სანდო პარტნიორი და მე ვფიქრობ, არც გამოცდილება და არც კვალიფიკაცია არ გვაკლია იმისთვის, რომ კარგად გვეთანამშრომლა და ეს შევძელით. ჩვენ გავაგრძელებთ თანამშრომლობას ხელისუფლებასთან, მაგრამ ეს არ ნიშნავს, რომ არ ვიქნებით კრიტიკული, თუ ამის სა-ფუძველი გვექენება. მაგრამ, ჩვენი კამპანია, ძირითადად, მიმართული იქნება იმისკენ, რომ ღიად ვილაპარაკებთ - რა შევძელით, რას მივაღწიეთ, რაში იყო ჩვენი წვლილი და რა ვერ შევძელით, არ გვეყო ძალა, ენერგია და არ გვეყო ჩვენი რაოდენობა. ასევე, ღიად ვილაპარაკებთ, თუ რა არის გასაკეთებლი, რაც ვერ გავაკეთეთ ხელისუფლებაში ყოფნის დროს. ვეტყვით ამომრჩეველს, რომ ახლა ჩვენ ვაგრძელებთ ამ თემებზე მუშაობას, რაც ვერ შევძელით და უნდა გავაკეთოთ და კრიტიკაც მოგვიწევს, რატომ ვერ შევძელით, ამის თქმაც მოგვიწევს. ამიტომ, ვერ ვხედავ პრობლემას, გვყავდეს მინისტრები ხელისუფლებაში და, თან, თუ ხედავ პრობლემებს ან მთავრობის კურსში ან სხვა მიმართულებით, არ გააკრიტიკო.

 

 

- პირველად როდის მიხვდით, რომ კრიზისი შეგექმნათ კოალიციის შიგნით?

 

- კრიზისს არ დავარქმევდი. კრიზისი იყო, მაგალითად, როცა „თავისუფალი დემოკრატები“ გამოვიდნენ კოალიციიდან. მაშინ შეიქმნა კრიზისი, იმიტომ, რომ ეს იყო აბსოლუტურად მოულოდნელად მიღებული გადაწყვეტილება. მაშინ გვახსოვს, რომ თავდაცვის სამინისტროში რამდენიმე თანამშრომელზე აღიძრა საქმე. გვახსოვს რეაქცია „თავისუფალი დემოკრატებისა“ და, თუ გახსოვთ, მაშინ ჩვენ, რესპუბლიკელებმა, გავაკეთეთ პირველი განცხადება: ვთქვით, რომ სოლიდარობას ვუცხადებთ „თავისუფალ დემოკრატებს“ და გვინდა გამოვრიცხოთ პოლიტიკური შემადგენელი ამ პროცესიდან. რამაც გაუგებრობა გამოიწვია კოალიციის შიგნით. მერე, „თავისუფალი დემოკრატების“ ყრილობას დავესწარით სულ რაღაც ოთხ დღეში. დაესწრო სამი ძირითადი გადაწყვეტილების მიმღები პარტიაში: პარლამენტის თავმჯდომარე იყო, პარტიის პოლიტიკური მდივანი იყო და პარტიის თავმჯდომარე. ჩვენ სამნი დავესწარით ამ ყრილობას, სადაც პარლამენტის თავმჯდომარემ, რესპუბლიკური პარტიის ლიდერმა, მიმართა დელეგატებს და თქვა, რომ თანამოაზრეები ვართო. მაშინ ეს პროცესი იმდენად სწრაფად განვითარდა და იმდენად სწრაფად მიიღეს „თავისუფალმა დემოკრატებმა“ გადაწყვეტილება, რომ გასულიყვნენ, მართლა კრიზისი შეიქმნა კოალიციაში. მოუმზადებელი იყო კოალიცია, მაგრამ გადავლახეთ ეს კრიზისი დანაკარგით.

ჩვენს შემთხვევაში კრიზისი არ არის, იმიტომ რომ „რესპუბლიკური პარტია“ დიდი ხანია ემზადება ამ თემებზე გადაწყვეტილების მისაღებად. ეს არ არის ამ შაბათ-კვირას მიღებული გადაწყვეტილება. როგორც კი საარჩევნო ფაზაში შევიდა პროცესი, 2016 წლის მოახლოებასთან ერთად, ჩვენ დავიწყეთ მზადება: სად ვართ? რა არის ჩვენი როლი? ჩვენ ეროვნული კომიტეტის დღის წესრიგებს რომ გადახედოთ, ორ თვეში ერთხელ ტარდე-ბა კომიტეტი, თითქმის ყველაზე განიხილება რესპუბლიკელების ადგილი და როლი ქართულ პოლიტიკაში, კოალიციაში. რას ვაპირებთ, როგორ ვართ? სად ვართ? ამიტომ, ეს ჩვეულებრვიი თემა იყო, რომელიც იხილებოდა. და, ამიტომ, ახლა მივედით დასკვნამდე, რომ ცალკე უნდა გვეყარა კენჭი. ჩვენი გადაწყვეტილება მყისიერად არ გამოვაქვეყნეთ, მიუხედავად იმისა, რომ გავრცელდა ინფორმაცია, რომ გადაწყვეტილება მიღებულია და მილიონი ვერსია გაჩნდა. ჩვენ მივეცით დრო კოალიციის ლიდერს, რომ მომზადებულიყო ამ ახალი რეალობისთვის. აღნიშნა კიდეც, გამოსვლისას, პარლამენტის თავმჯდომარემ, რომ ის იყო საქმის კურსში, რომ ჩვენ ამაზე ვმსჯელობდით. რა გადაწყვეტილების მიიღებდა პარტია, ამას წინასწარ ვერ ვიტყოდით. ჩვენი ეროვნული კომიტეტი 35 კაცისგან შედგება. ამიტომ, ხანგრძლივი დისკუსია გვქონდა. განწყობები კი, მაგრამ გადაწყვეტილება სხვა რამეა. ამიტომ კოალიციაში კრიზისი არ შექმნილა.

 

- არც გოგი თოფაძის განცხადებები იყო პირველი ნიშანი იმისა, რომ კოალციიაში აღარ იქნებოდით?

 

- გოგი თოფაძის გამო კოალიციის დაშლას არავინ აპირებდა. გოგი თოფაძის განცხადებები პრობლემა იყო არა ჩვენთვის, რესპუბლიკელებისთვის, მიუხედავად იმისა, რომ ჩვენზე მოდიოდა ძირითადი დარტყმა - მისი განცხადებები პრობლემა იყო მთელი კოალიციისთვის. მისი განცხადებები დამაზარალებელი იყო მთელი ქვეყნისთვის.

 

- მიგაჩნიათ, რომ გოგი თოფაძე თავის სახელით ლაპარაკობდა?

 

- გოგი თოფაძე არ არის მარტო. ამაში დარწმუნებული ვარ. ვისი სახელით ლაპარაკობს, ვერ ვიტყვი, მაგრამ მისი განცხადებები თანხვედრაში იყო, სამწუხაროდ, ოკუპანტი ქვეყნის განცხადებებთან. იმ ადამიანების განცხადებებთან, ვინც, ნებსით თუ უნებლიედ, არიან რუსეთის რბილი ძალების გავლენის ქვეშ. ეს ყველაფერი თანხვედრაში იყო და ჩვენს განცხადებაშიც აღვნიშნეთ, რომ, კოორდინირებულია თუ დამთხვევითი ეს განცხადებები, ჩვენს გადაწყვეტილებებზე გავლენას ვერ იქონიებდნენ. ჩვენ არ მივიღებთ გადაწყვეტილებას ამ განცხადებების ფონზე და ამ განცხადებების გამო. მაგრამ, თოფაძის განცხადებებმა კრიზისი შეუქმნა მთელ კოალიციასა და მთელ ქვეყანას. არაერთი საჯარო განცხადება გაკეთდა მის სტალინთან და ანტიდასავლურ განცხადებებთან დაკავშირებით .

- თოფაძის შეტევა ივანიშვილის ხელდასმის და მწვანე შუქის გარეშე ხორციელდებოდა?

- შეიძლება, ეჭვები ვინმეს ჰქონდეს, მაგრამ მე არავითარი საფუძველი არ მაქვს, რომ ეს ვამტკიცო. მაგრამ თოფაძე რომ ამ პროცეში მარტო არაა - ამაში დარწმუნებული ვარ, მაგრამ ვისგანაა, არ ვიცი.

 

- საპარლამენტო არჩევნებზე დამოუკიდებლად გასვლის გადაწყვეტილება რამენაირად თუ არის განპირობებული ვიდეოშანტაჟით?

 

- ეს კითხვა რომ არ გაჩენილიყო, ჩვენს განცხადებაში ხაზი გავუსვით, რომ ჩვენ გადაწყვეტილებას მივიღებთ მხოლოდ საკუთარი პოლიტიკური დღის წესრიგით და არა კადრებით შანტაჟის, ტერორისტების ანტინატოური თუ სტალინისტების მუქარითა და შანტაჟით. იმიტომ, რომ ეს ყველაფერი ერთმანეთთან კოორდინაციაშია თუ უბრალოდ დაემთხვევა ერთმანეთს, ამის მტკიცება ძალიან რთულია. იმედი მაქვს, რომ ჩვენი სამარ-თალდამცავები ამას გამოავლენენ და კითხვები აღარ გაჩნდება: საიდან მოდის? ვისგან მოდის ეს ყველაფერი? იმიტომ, რომ ამ საკითხზე ყველაზე დიდი პასუხისმგებლობა ჩვენს ხელისუფლებას ეკისრება და იმედი მაქვს, რომ ძალიან სწრაფად გამოიძიებენ.

 

- მაშინ რატომ ახსენეთ თქვენს განცხადებაში ვიდეო შანტაჟი?

 

- იმიტომ ვახსენეთ, რომ კითხვები არ გაჩენილიყო, რომ ჩვენ ამ ფონზე ვიღებთ ამ გადაწყვეტილებას. ჩვენ ვთქვით, რომ წავალთ საკუთარი გადაწყვეტილებით და არა ამ შანტაჟის გამო. ჩვენ არ მიგვიღია და არ მივიღებთ და არ ვიღებთ გადაწყვეტილებას შანტაჟის გამო.

 

- იყო თუ არა შეცდომა, როცა თინა ხიდაშელმა ვრცელი ინტერვიუ მისცა გიორგი გაბუნიას ბიძინა ივანიშვილის საძულველ რუსთავი2-ზე?

 

- არა, ამ ეთერით ბევრი ადმაიანისთვის ბევრ კითხვას გაეცა პასუხი, სადაც შესაძლებლობა ჰქონდა თინას, ელაპარაკა ამ თემებზე. მეც ბევრ-ჯერ მიმიცია და ბევრი რესპუბლიკელი აძლევს ინტერვიუს რუსათავი 2-ს.

 

- ელოდებით თუ არა, რომ დადგება უსუფაშვილის გადადგომის საკითხი?

 

- არა. არც რაიმე მაძლევს ამის საფუძველს. განსაკუთრებით, პრემიერის განცხადების შემდეგ ეს განწყობა არც პარლამენტშია. გიორგი ვოლსკის განცხადება მოვისმინე, რამდენად მნიშვნელოვნად თვლის უსუფაშვილის პარლამენტის თავმჯდომარედ ყოფნას. არც განწყობაა და არც ტექნიკურად იქნება შესაძლებელი.

 

- როგორც უსუფაშვილმა თქვა, ხელისუფლებასთან ითანამშრომლებთ „ასე“. რას ნიშნავს „ასე“ თანამშრომლობა?

 

- არ მინახავს ეს განცხადება. როგორც ვთანამშრომლობთ ახლა, ისე ვითანამშრომლებთ. ჩვენი თანამშრომლობა არასდროს იყო უსაზღვრო კომპრომისებით და ჩვენი ღირებულებების საწინააღმდეგოდ. ჩვენ პრინციპებისთვის არ არასდროს გვიღალატია. ჩვენ გვყავს ამომრჩეველი, რომელიც კრიტიკულადაა განწყობილი და ფიქრობს, რომ უფრო მეტი იყო კომპრომისი, ვიდრე ელოდნენ. მაგრამ კოალიციასთან თანამშრომლობა არის კომპრომისი. ჩვენ მოგვიწია კომპრომისებზე წასვლამ. ამიტომ, სიახლე ბევრად განსხვავებული არ იქნება. ჩვენ, აქამდეც, ყოველთვის ხმა-მაღლა ვსაუბრობდით პრობლემებზე. მოსმენების კანონზეც ალტერნატივა გვქონდა და იყო ცხარე კამათი. ახლა საერთო სასამართლოებზე გვაქვს ჩვენი მოსაზრებები და არც აქამდე დაგვიმალავს და არც მერე დავმალავთ განწყობებს. თბილისის საკრებულოს წევრი ვარ და ახლა, მაგალითად, ბაღების საკითხზე აბსოლუტურად დარწმუნებული ვარ, რომ შეცდომას უშვებს თბილისის მერია და რომ არ თანამშრომლობს ბაღების დირექტორებთან ისე, როგორც უნდა ითანამშრომლოს და ეს პრობლემაა და ბევრი სხვა პრობლემაც იყო და არის. აქამდე ვიყავით კოალიციურ რეჟიმში: ერთობლივად ვახერხებდით ამ პრობლემების გადაჭრას. ამიერიდან უფრო მკაფიო იქნება ჩვენი წანააღმდეგობა. კომპრომისზე ძალიან უკიდურეს შემთხვევაში წავალთ, თუ ეს იქნება ქვეყნისთვის სასიცოცხლოდ მნიშვნელობის საკითხი, რომელზეც აუცილებელი იქნება, რომ ერთიანი პოზიცია გვქონდეს. ჩვენ ვიქნებით ძალიამ მკაცრი და მკაფიო. და როცა გვეკითხებიან, რომ - როგორ, როცა ხელისუფლებაში მინისტრები გვყავს - ეს არ ნიშნავს, რომ არაფერზე კრიტიკული არ ვიქნებით ან ვერ ვიქნებით, ან ჩუმად ვიქნებით. შეიძლება, ისე წავიდეს საქმე, რომ იმდენად კრიტიკული ვიყოთ, რომ რთული გახდეს თანამშრომლობა. არავინ იმის გარანტიას არ იძლევა, რომ ჩვენ ასე ხავერდოვნად მივალთ აქტიურ წინასაარჩევნო კამპანიამდე.

 

- ამიტომ გეკითხებით. გამორიცხავთ უსუფაშვილის გადაყენების საკითხი დადგეს?

 

- ამ ეტაპზე გამოვრიცხავ მინისტრების გადაყენებასაც. პროცესი გვაჩვენებს. ერთია ჩვენი მზაობა, მეორეა - პარტნიორების მზაობა. პარტნიორები რამდენად შეძლებენ ამას. ჩვენ აღვნიშნეთ, რომ მზად ვართ თანამშრომლობისთვის, თუ პრემიერ-მინისტრის გუნდი იქნება იმავე ხედვის, როგორიც მოვისმინეთ. ანუ თვითონ როგორიც აქვს. მაგრამ, თუ დამოუკიდებელ რეჟიმში მოთამაშე თავისუფალი პოლიტიკოსები გააგრძელებენ იმავე ტიპის განცხადებებს, რაც მოგვისმენია რესპუბლიკელებზე - უსაფუძვლო ცილისწამებას და დარტყმებს - ჩვენც პასუხი გვექნება. არ ვაპირებთ გაჩუმებას.

 

- თქვენ ხშირად გაძახებენ, რომ 3%-იანი პარტია ხართ. ბოლოს როდის გაზომეთ თქვენი პარტიის რეიტინგი?

 

- ვინც გვაძახებს, ყველა არის ჩვენი არაკეთილმოსურნე და არაფრით ხელმძღვანელობს...

 

- როდის გაზომეთ?

 

- არავის გაუზომავს. ყველა კვლევა თუ გამოკითხვა, რომელიც გაკეთდა 2012 წლიდან, ზომავდა ყოველთვის კოალიციას მთლიანად და არა პარტიებს. ან თუ იზომებოდა პარტია -კოალიციის შემადგენლობაში. ამიტომ, ძალიან რთულია თქმა და ემოციის დონეზე თუ გავაკეთებთ პროგნოზს. ჩვენ შიდა კვლევებს ვაკეთებთ და ვიცით, რომ ასე არ არის და ჩვენ ბარიერის გადალახვის პრობლემა არ გვექნება. როცა დავიწყებთ აქტიურად საარჩევნო კამპანიას, ეს კითხვა აღარ გაჩნდება. მესმის, რომ ეს 2008 წლიდან მოყოლებული განცდაა, როცა ბარიერი ვერ გადავლახეთ. ამას ამბობენ, მაგრამ ჩვენი კვლევები ამას არ გვეუბნება. თან პოტენციური ამომრჩეველიც გვეუბნება, რომ თუ ჩვენი კამპანია აქტიური იქნება და იქნება მკაფიო მესიჯები, ჩვენ ამის პრობლემა ნამდვილად არ გვექნება. თან დღევანდელი რეალობა ასეთია: მოსახლეობის 60% თვლის, რომ მათ ჯერ არჩევნი არ გაუკეთებიათ. 60% არის მოლოდინში, თუ რას შესთავაზებენ პარტიები. არსებობს კვლევები, სადაც ჩანს, რომ ეს ამომრჩეველი არის მოლოდინში, რომ რომელიმე პარტიამ ნათელი მკაფიო მესიჯებით აუხსნას, რას პირდება სინამდვილეში და საით წაიყვანს ქვეყნას. ამიტომ, დიდი მნიშვნელობა აქვს აქტიურ საარჩევნო ფაზაში მკაფიო, გულწრფელი, ნათელი სურათის ჩვენებას ამომრჩევლისთვის. ამას რესპუბლიკური პარტია შეძლებს.

 

 - ნახევარი წელია არჩევნებამდე დარჩენილი - მაინც გარკვეული ფორსმაჟორი შეგექმნათ?

 

- დრო არ არის ბევრი, მაგრამ საკმარისია, თუ ინტენსიურად ვიმუშავებთ. ეს სჯობს იმ ვითარებას, როცა ორი თვით ადრე აცხადებ, რომ საარჩევნო ფაზაში შედიხარ. ეს საკმარისი დროა კვლევების ჩასატარებლად, ძირითადი მესიჯების გამოსაკვეთათ. ფორსმაჟორი არაა, მაგრამ ცოტა დროა.

 

- ხომ არ მიგაჩნიათ, რომ ხალხთან დაკარგეთ კონტაქტი და ძალაუფლებას ფლობდით მხოლოდ ბიძინა ივანიშვილის ხარჯზე?

 

- კოალიციაში ყოფნა ნიშნავს ძალიან ბევრ კომპრომისს და, ასევე, უკან დახევას იმ ნაწილში, როცა შენ რესპუბლიკური მესიჯებით ესაუბრები შენს ამომრჩეველს. ყველა ევროპულ კოალიციაში ეს პრობლემაა და ეს გამოწვევა აქვთ არადომინანტ პარტიებს. ამიტომ, ჩვენც მოგვიწია ბევრ კომპრომისზე წასვლა და ამომრჩეველთან ნაკლები მკაფიოობა. ამ სამი წლის მანძილზე რესპუბლიკურ პარტიას ამომრჩეველთან თავის კამპანია არ უწარმოებია. კი, ჩვენ ვმუშაობთ ადგილებზე, ვცდილობთ, რომ გვხედავდეს ჩვენი ამომრჩეველი და არ დავკარგოთ კონტაქტი და არასდროს ჩვენ არ დაგვიკარგავს კონტაქტი ჩვენს ერთგულ და ძირითად ამომრჩეველთან. არის ჩვენი ისეთი ამომრჩეველი, რომელიც ჩვენ გავანაწყენეთ ზედმეტი კომპრომისებით, როცა არ ვიყავით ძალიან მკაფიო და მოგვიწია მათთან ახსნა-განმარტებები, თუ რას ნიშნავს კოალიციაში ყოფნა. ასევე, არის ამომრჩეველი, რომლიც უფრო მსუბუქად უყურებს იმას, რომ კოალიციაში ყოფნა ნიშნავს კომპრომისზე წასვლას. ამიტომ, ბუნებრივია, როცა ბალანსს იჭერ შენს პარტნიორებსა და ამომრჩევლებს შორის. რა თქმა უნდა, პარტიის პროფილი ცოტათი უფერულდება. ჩვენ საკმარისი დრო გვაქვს, რომ პროფილი გამოვკვეთოთ თავიდან და შემდეგ გამოვკვეთოთ, თუ რას ვთავაზობთ ამომრჩეველს. ჩვენ ამომრჩეველთან კონტაქტი არ დაგვიკარგავს, იმიტომ, რომ ადგილებზე გვყავს ძალიან სერიოზული ადგილობრივი ორგანიზაციები. ყველა რაიონში ჩვენ გვყავს, ზოგან უფრო ძლიერი ზოგან ნაკლებად ძლიერი, მაგრამ ყველგან გვყავს ჯგუფები, რესპუბლიკური პარტიის ადგილობრივი ორგანიზაციები, რომლებიც წელიწადში ერთხელ კრებას ატარებენ, კომიტეტს ირჩევენ და აქტიურად მუშაობენ. ყველა საკრებულოში გვყავს რესპუბლიკელი, 49 საკრებულოში გვაქვს წმინდა რესპუბლიკური ფრაქცია - ანუ სამივე წევრი რომ რესპუბლიკელია. მასობრივი პარტია და სუპერპოპულარული ჩვენ ისედაც არასოდეს ვყოფილვართ, რეალისტები ვართ და ვიცით, ჩვენი ფასეულობებისა და ღირებულებების მქონე პარტია ვისზე უნდა იყოს ორიენტირებული და ვისთვის უნდა ვიყოთ. ეს მკაფიოდ განსაზღვრული გვაქვს და ვიცით.

 

- გიფიქრიათ თუ არა „ნაციონალურ მოძრაობასთან“ თანამშრომლობაზე, მაგალითად, საარჩევნო კოდექსის საკითხზე?

 

- საარჩევნო კოდექსზე თანამშრომლობა არის ყველა პარტიასთან. მე როგორც ვხედავ, არსებობს ინტერპარტიული პროცესი, არსებობს არასაპარლამენტო პარტიებთან ყველა ფორმატში დისკუსია და შეთანხმებები , სადაც კი შეიძლება გადაიკვეთოს პარტიების ინტერესები. ჩვენ გვინდა რეგიონალურ პროპორციული სისტემა. ჩვენ ვრჩებით იმავე აზრზზე. კოალიციაში ყოფნის დროს ჩვენ წავედით კომპრომისზე მაგ შემთხვევაშიც, რადგან შეუძლებელი იყო შეთანხმება იმაზე, რომ 2016 წელს გვქონოდა ეს სისტემა. შევთანხმდით: ეს არის ორეტაპიანი რეფორმა. ესეც არის შეთანხმების საგანი, რომ ჩვენ 2016 წელს გვექნება ოლქების გათანაბრების პრინციპით ცვლილება და 2020-ში სწორედ ეს რეგიონალურ-პროპორციული სისტემა, რაზეც პრინციპულები ვართ, მაგრამ ისევ კომპრომისზე წავედით. ვნახოთ, როგორ წავა კენჭისყრა როგორი იქნება არჩევანი: შეთანხმება შესრულდება თუ არ შესრულდება.

 

- თქვენი აზრით, ვინ დგას ე.წ. ვიდეო შანტაჟების უკან?

 

- პროკურატურამ ვერ დაადგინა და მე როგორ ვთქვა? ვინც არ უნდა იყოს ამ სერიების დამგეგმავი და გამავრცელებელი, ყველაზე დიდი პასუხისმგებლობა ეკისრება ხელისუფლებას. ხელისუყფლება არის პასუხისმგებელი, რომ ეს საქმე სწრაფად და ეფექტურად გამოიძიონ და კითხვები არ დარჩეს. მე კითხვები მაქვს. თუ ჩვენი ხელისუფლება და სამართლებრივი ორგანოები არ გამოიკვლევენ ბოლომდე, მანამდე ყველა შეკითხვა და ეჭვი არის ლეგიტიმური. ვიზეც არ უნდა გამოითქვას ეჭვი - ლეგიტიმურია. ეს იმიტომ, რომ გამოძიებული არ არის და ყველას თავისი ვერსია აქვს. ხელისუფლებამ რაც შეიძლება სწრაფად უნდა გამოიძიოს, რომ ეს ეჭვები გაქრეს.

 

- ალბათ, თვალს ადევნებთ ამ პროცესს. როგორ მიდის გამოძიება?

 

- ცუდად. ამდენი დრო გავიდა და კონკრეტული არაფერი გაგვიგია. მიდის გამოძიება, სწრაფია რეაგირება, მაგრამ შედეგი არ აქვს და ტერორი გრძელდება. ისიც არის, რომ საზოგადოებამ და მედიამ ძალიან მკაფიო პასუხი გასცა ამ ტერორს და ეს არის ძალიან სერიოზული პროგრესი - სოლიდარობა. სერიოზული პასუხი გასცა საზოგადოებამ, რომელიც ამბობს, რომ არ მაინტერესებს და მედიამ, რომელმაც უპასუხა, რომ არ შევასრულებ იმას, რისი იმედიც აქვთ ამ ტერორისტებს. მაგრამ, უფრო მკაფიო პასუხია იქნებოდა მედიის მხრიდან სრული იგნორირება.

 

- თქვენი აზრით, ვინ დააკომპლექტებს მთავრობას არჩევნების შემდეგ?

 

- ძალიან რთულია პროგნოზი. ახლა სხვა რეალობაა. სარეიტინგო გამოკვლევების მერე შეიძლება პროგნოზის გაკეთება. მაგრამ არჩევნები ნამდვილად საინტერესო იქნება.

 

- თქვენი როლი როგორი იქნება მთავრობის დაკომპლექტებაში?

 

- ჩვენ ამომრჩეველს უნდა ვუთხრათ, რომ ჩვენ უნდა გვქონდეს მთავრობის სწორედ დაკომპლექტებაში როლი. ოპოზიციაში ვიქნებით თუ ხელისუფლებაში, ამას გვჩვენებს - ისევ და ისევ - როგორ არჩევნას გააკეთებს ამომრჩეველი. ახლა ძალიან რთულია საუბარი, ვისთან ვიქნებით ან რა როლი გვექნება დაკომპლექტებაში.

 

- მზად ხართ ისევ კოალიციაში იყოთ მეჭიაურთან და ვოლსკისთან ერთად?

 

- თუ როგორი იქნება „ქართული ოცნების“ სია ჩვენ გავლენა არ გვაქვს, მაგრამ, როგორი იქნება „ქართული ოცნება“ ამას დავინახავთ ყრილობაზე, თუ როგორ დაკომპლექტდება პარტიის ძირითადი მმართველი ორგანო ანუ კვირიკაშვილის გუნდი. შევხედავთ, რამდენად შესაძლებელი იქნება თანამშრომლობა. როგორი იქნება თანამშრომლობა არჩევნების შემდეგ, დამოკიდებული იქნება წინა საარჩევნო კამპანიაზე.

 

- არ მიგაჩნიათ, რომ ეს ვიდეოშანტაჟები წინასაარჩევნო ვითარების ნაწილია უკვე?

 

- თუ წინასაარჩევნო კამპანია დაფუძნებული იქნება ვიდეოშანტაჟზე, რაღაცა ტიპის ფილმებზე, რომელსაც აანონსებენ, თუ მთელი კამპანია მიმართული იქნება, რომ, აი, კიდევ, ის ცხრა წელი და ა.შ. ეს არ იქნება ევროპული წინასაარჩევნო ვითარება. ასეთი მოლოდინი გვაქვს ჩვენ, რომ კამპანიაც უნდა იყოს ევროპული: პარტიების პაექრობა, დებატები, პროგრამები და ა.შ. რამდენად გამოვა ეს, რთული სათქმელია, იმიტომ, რომ ჩვენ ვართ ერთი ამ მოედანზე. ეჭვებია, რომ წინასაარჩევნო კამპანია იქნება სწორედ ამ ვიდეო შანტაჟებზე დაფუძნებელი. ჩვენ დავინახავთ, რამდენად იქნება შესაძლებელი ამა თუ იმ პარტიასთან თანამშრომლობა არჩევნების შედეგების გამოცხადების შემდეგ.

 

- რა განცდა დაგეუფლათ, როცა დაინახეთ, რომ ციხისძირში ხე მოთხარეს და გადაიტანეს ივანიშვილის ეზოში?

 

- არაფერი. მე მეუფლება გრძნობები, როცა ვხედავ უმოწყალოდ გაჩეხილ ტყეებს და ასეთებიც არის, უკანონოდ გათავისუფლებულ ხალხს ან დაუფიქრებლად გაშენებულ ნარგავებს, რომელიც გაიხარებს თუ არა, არ ვიცით. ამ კონკრეტულ შემთხვევაში არანაიარი განცდა არ მქონია. ვიკითხე, გავიგე, გასაგები იყო. არ ვფიქრობ, რომ ეს ქვეყნისთვის იყო მთავარი პრობლემა დღეს.

 

- ეთანხმებით, რომ ერთი კაცის არაფორმალური მმართველობაა დღეს ქვეყანაში?

 

- მმართველობა ნიშნავს ყოველდღიურ ჩართულობას და უშუალო მართვას. ამას ვერ ვხედავ. მართვა ხორციელდება ყოველდღიურ, ყოველ-საათობრივ რეჟიმში.

 

ქართული გაზეთი

ავტორი: გუგა სულხანიშვილი

6 აპრილი, 2016 წელი

სიახლეები
სოციალური ქსელი